Ақтөбеде әлеуметтік кәсіпкерлік пен инклюзивті қоғамды дамыту мәселелері талқыланды

Бүгін «AMANAT» партиясы Ақтөбе облыстық филиалы жанындағы Әйелдер қанатының «Инклюзивті қоғамды дамытуға ықпал жасау» бағыты бойынша жұмыс тобының кезекті отырысы өтті.

Жиынға Әлеуметтік инноваторлар қауымдастығының вице-президенті Асхат Ахмадиев, қалалық мәслихат төрағасы, жұмыс тобының жетекшісі Анар Даржанова, партияның облыстық филиалы төрағасының орынбасары Әсел Сарманова және өңірдегі әлеуметтік кәсіпкерлер қатысты.

Кездесу барысында әлеуметтік кәсіпкерлікті қолдау, инклюзивті қоғам қалыптастыру және саладағы өзекті мәселелер талқыланды. Қатысушылар әлеуметтік кәсіпкерліктің қоғамдағы әлеуметтік түйткілдерді шешудегі маңызына тоқталып, мемлекеттік қолдау тетіктері мен жаңа бастамалар жөнінде пікір алмасты.

Жиында сөз алған Асхат Ахмадиев Ақтөбе облысында әлеуметтік кәсіпкерлік бағытының белсенді дамып келе жатқанын атап өтіп, өңір кәсіпкерлерінің бастамаларына жоғары баға берді.

Өз кезегінде Анар Даржанова әлеуметтік кәсіпкерлермен ашық диалог орнатудың маңыздылығын айтып, мұндай кездесулер тәжірибе алмасуға және ортақ мәселелерді бірлесіп шешуге мүмкіндік беретінін жеткізді.

Ал Әсел Сарманова жиында талқыланған әлеуметтік кәсіпкерлікті дамытуға қатысты заңнамалық бастамалар мен мемлекеттік қолдау тетіктері қоғам үшін маңызы зор екенін атап өтті.

Кездесу соңында қатысушылар әлеуметтік кәсіпкерлікті дамыту бағытындағы өзара ынтымақтастықты нығайтып, өңірде инклюзивті қоғам қалыптастыру бойынша бірлескен жұмысты жалғастыруға келісті.