Петропавл қаласында «Vildana Studio» сұлулық салонының иесі Вильдана Қожахметова «Бақытты отбасы» партиялық жобасы аясында тегін курс ұйымдастырды.
Петропавлда «AMANAT» партиясы Солтүстік Қазақстан облыстық филиалы жанындағы әйелдер қанатының мүшесі, «Vildana Studio» сұлулық салонының иесі Вильдана Қожахметова «Бақытты отбасы» партиялық жобасы аясында ол отбасы үлгісіндегі балалар ауылының тәрбиеленушілеріне арналған тегін курс ұйымдастырды.
«Өз өзіңе визажист бол» деп аталатын шеберлік сабағында қыз балаларға күнделікті макияж жасау, бет терісіне күтім жасау және сәнді бояну тәсілдері үйретілді. Қатысушылар теориялық біліммен қатар, тәжірибелік дағдыларды да меңгерді.
Оның айтуынша, мұндай бастамалар жасөспірім қыздардың өз-өзіне деген сенімділігін арттырып, жеке күтім мәдениетін қалыптастыруға ықпал етеді. Сонымен қатар, курс қатысушыларға болашақ мамандық таңдауға да бағыт-бағдар береді.
Айта кетейік, «Бақытты отбасы» жобасы аясында өңірде әлеуметтік маңызы бар түрлі бастамалар жүзеге асырылып келеді.