«AMANAT» ПАРТИЯСЫНЫҢ АҚТӨБЕ ОБЛЫСТЫҚ ФИЛИАЛЫНДА ӘЙЕЛДЕР ҚАНАТЫ ЖИЫН ӨТКІЗДІ

«AMANAT» партиясы Ақтөбе облыстық филиалы жанындағы Әйелдер қанатының «Әйелдердің денсаулығын нығайту және отбасы институтын күшейту» бағыты аясында жұмыс жиыны өтті. Жиынға Ақтөбе облыстық мәслихатының депутаты, аталған бағыттың жетекшісі Дюсенова Айгүл Егізбайқызы жетекшілік етті.

Іс-шараға партияның облыстық филиалы қызметкерлері мен Әйелдер қанатының мүшелері, денсаулық сақтау саласының өкілдері, волонтерлік ұйым мүшелері, блогерлер, психологтар, сондай-ақ қала және аудандық отбасы орталықтарының мамандары қатысты.

Кездесудің басты мақсаты – әйелдердің денсаулығын сақтау және нығайту, отбасы құндылықтарын қолдау, әлеуметтік осал топтағы әйелдерге жан-жақты көмек көрсету, сондай-ақ осы бағыттағы жобаларды тиімді жүзеге асыру жолдарын талқылау болды.

Жиын барысында қатысушылар өз салалары бойынша тәжірибе алмасып, төмендегі бағыттар бойынша мәселелерді қарастырды:
• әйелдер денсаулығын нығайту мәселелері;
• ана мен баланы қорғау, табиғи ана сүтімен емізуді қолдау тетіктері;
• аз қамтылған әйелдерге арналған әлеуметтік қолдау шаралары;
• практикалық іс-шараларды ұйымдастыру тәжірибесі;
• отбасылық құндылықтарды дәріптеу және нығайту.

Кездесу қорытындысында қатысушылар алдағы жұмыс жоспарын айқындап, бірлескен іс-шараларды ұйымдастыру тетіктерін талқылады. Сонымен қатар ақпараттық сүйемелдеу мен медиа ресурстарды пайдалана отырып, әйелдер мен отбасыларға арналған жобаларды кеңінен насихаттау мәселесіне ерекше назар аударылды.

Аталған жиын әртүрлі сала мамандарының басын қосып, әйелдер денсаулығы мен отбасы институтын қолдауға бағытталған жұмыстарды жүйелі түрде дамытуға мүмкіндік берді. Кездесу соңында қатысушылар өзара ынтымақтастықты нығайтып, бірлескен жобаларды тиімді іске асыру жөнінде ортақ келісімге келді.