«ЖАҺАНДАНУ ДӘУІРІНДЕГІ БАЛА ТӘРБИЕСІ ЖӘНЕ АТА-АНАНЫҢ РӨЛІ» семинары өтті
Аудандық Әйелдер қанатының бастамасымен «Руханият» орталығында «Жаһандану дәуіріндегі бала тәрбиесі және ата-ананың рөлі» тақырыбында тағылымы терең, мазмұнды психологиялық семинар ұйымдастырылды.
Іс-шараны тәжірибелі психолог, аудандық филиал жанындағы Әйелдер қанатының мүшесі А.Тлеумбетова жүргізіп, заманауи қоғамдағы бала тәрбиесінің өзекті мәселелеріне тоқталды. Қатысушылар бала тәрбиесіндегі ата-ананың жауапкершілігі мен рөлін жаңа қырынан түсініп, тәжірибе алмасуға мүмкіндік алды.
Семинар барысында түрлі танымдық тренингтер мен практикалық жаттығулар өткізілді:
«Көбелектің қанаты» тренингі арқылы ата-аналар әрбір сөз бен әрекеттің баланың болашағына әсер ететінін ұғынып, бала жанының нәзіктігін терең сезінді.
«Екі буын» жаттығуында дәстүрлі және заманауи тәрбиенің тиімді тұстары сараланып, оларды үйлестіру жолдары талқыланды.
«Бақытты ата-ана көйлегі» жаттығуы ата-ананың ішкі күйі мен көңіл-күйі бала тәрбиесіне тікелей әсер ететінін көрсетті.
«Гаджет келісімшарты» барысында ата-ана мен бала арасындағы өзара түсіністік пен сенімге негізделген цифрлық тәртіп қалыптастырудың маңызы айтылып, арнайы келісім үлгісі ұсынылды.
Семинар ашық пікір алмасу форматында өтіп, қатысушылар өз ойларын ортаға салып, жаңа көзқарастар қалыптастырды.
Саналы ұрпақ – сапалы тәрбиеден бастау алады. Бірге дамып, болашақ үшін бірлесе еңбек етейік!